નહેરમાં ડૂબેલા યુવકનો મૃતદેહ મળ્યો — માંગરોળના મહુવેજ પાસે દુર્ઘટના, પરિવારમાં શોકની છાયા
પરિવારજનો ઘટનાસ્થળે દોડી આવ્યા હતા અને શોકમય માહોલ સર્જાયો હતો.
માંગરોળ (સુરત):
સુરત જિલ્લાના માંગરોળ તાલુકાના મહુવેજ ગામ પાસે નહેરમાં નહાવા ગયેલા યુવકનો મૃતદેહ મળી આવ્યો છે. કામરેજ ફાયર વિભાગની ટીમે રાતભર ચાલેલી શોધખોળ બાદ આજરોજ સવારે યુવકનો મૃતદેહ બહાર કાઢ્યો હતો. આ દુઃખદ ઘટનાથી સમગ્ર વિસ્તારમાં શોક છવાઈ ગયો છે.
મૃતક યુવકનું નામ અમરજીત હોવાનું જાણવા મળ્યું છે. તે પોતાના મિત્રો સાથે મહુવેજ નજીકની નહેરમાં નહાવા ગયો હતો, પરંતુ પાણીના ઊંડા પ્રવાહમાં અચાનક તણાઈ જતાં બહાર આવી શક્યો નહોતો.
યુવક ડૂબી જતાં મિત્રો અને આસપાસના લોકોમાં હડકંપ મચી ગયો હતો. તાત્કાલિક કોસંબા પોલીસ અને ફાયર વિભાગ ને જાણ કરાઈ હતી. નહેરમાં પાણીનો પ્રવાહ વધારે હોવાને કારણે શોધખોળ દરમિયાન બચાવદળને ભારે મુશ્કેલીઓનો સામનો કરવો પડ્યો હતો.
અંતે, કામરેજ ફાયર વિભાગની ટીમે લાંબી મહેનત બાદ સવારે યુવકનો મૃતદેહ શોધી કાઢ્યો. ઘટનાની જાણ થતાં પરિવારજનો ઘટનાસ્થળે દોડી આવ્યા હતા અને શોકમય માહોલ સર્જાયો હતો.
—
સ્થાનિક સૂત્રોનું નિવેદન:
“પાણીનો પ્રવાહ ખૂબ જ તેજ હતો, જેના કારણે યુવકને તરત બચાવવો શક્ય રહ્યો નહોતો. ફાયર વિભાગની ટીમે સતત પ્રયાસો કર્યા બાદ મૃતદેહ બહાર કાઢ્યો.”
