પલસાણા ઓવરબ્રિજ પર ટેન્કરમાં આગ

સુરત જિલ્લાના પલસાણા ઓવરબ્રિજ પર બુધવારે બપોરે કોસ્ટિક સોડા લઈ જતાં ટેન્કરમાં અચાનક આગ લાગી હતી. ભરૂચના દહેજથી મહારાષ્ટ્રના પુણે તરફ જઈ રહેલા ટેન્કર (GJ-23-AT-2429) ના પાછળના ટાયરમાં આગ લાગી અને ક્ષણોમાં જ ધુમાડાના ગોટેગોટા આકાશમાં ફાટી નીકળ્યા હતા. ઘટના નેશનલ હાઈવે નં. 48 પર બની હતી.

હાઈવે પરથી પસાર થતાં વાહનચાલકોમાં ધુમાડો જોઈ ગભરાટ ફેલાયો હતો. થોડા જ સમયમાં આગે વિકરાળ સ્વરૂપ ધારણ કર્યું હતું, પરંતુ ટેન્કર ડ્રાઈવરના ચાતુર્યથી એક મોટી જાનહાનિ અટકી ગઈ.

ડ્રાઈવરે ટેન્કર સાઈડ પર ખસેડતાં મોટી દુર્ઘટના ટળી

ટેન્કરમાં કોસ્ટિક સોડા લાઈમ ભરાયેલું હોવાને કારણે નાની ભૂલ પણ મોટી વિનાશક ઘટના સર્જી શકતી હતી. પરંતુ ડ્રાઈવરે ઝડપથી ટેન્કરને રોડની સાઈડમાં સુરક્ષિત જગ્યા પર ઉભું રાખ્યું.
જો તેણે બ્રિજની વચ્ચે અથવા ભીડવાળી જગ્યાએ ટેન્કર રોક્યું હોત તો આગનું રૂપ ઘાતક બની શકે તેમ હતું.

ફાયર વિભાગની બે ગાડીઓ દોડી આવી, મિનિટોમાં કાબૂ

આગની જાણ કડોદરા PEPL ફાયર સ્ટેશનને થતાં જ બે ફાયર ટેન્ડર ઘટના સ્થળે પહોંચી ગયાં. ફાયર ફાઇટર્સે પાણીનો તીવ્ર મારો ચલાવી ટૂંકા સમયમાં આગને સંપૂર્ણ રીતે કાબૂમાં કરી હતી.

આ દરમિયાન હાઈવે નંબર 48 પર બંને દિશામાં લાંબો ટ્રાફિક જામ સર્જાયો હતો. પલસાણા પોલીસે ઘટના સ્થળ પર પહોંચી ટ્રાફિક નિયંત્રિત કર્યો અને આગ ઓલવાયા બાદ ટેન્કરને હટાવવામાં આવ્યું.
કલાકો બાદ જ ટ્રાફિક ફરી સામાન્ય બની શક્યો.